மாமன்னர்கள் பற்றி தமிழ் தாத்தா!

பெரியமருதுபாண்டியர் தெய்வபக்தி உடையவர். தம் ஆட்சிக்குட்பட்ட ஆலயங்களில் நித்திய நைமித்தியங்கள் விதிப்படி காலத்தில் நடந்துவரும் வண்ணம் வேண்டியவற்றைச் செய்துள்ளார். ஆலயங்களுக்குத் தேவதானமாக நிலங்களை அளித்திருக்கின்றார்.

-டாக்டர் உ.வே.சாமிநாதையர்.

ஏடுதேடி டாக்டர் உ.வே.சாமிநாதையர் அவர்கள் மருதுபாண்டியர்கள் ஆட்சி செய்த நாடு முழுமையும் சுற்றி வந்தபின் கண்டறிந்து தான் எழுதிய மருதபாண்டியர் புத்தகத்தில் கலைமகள்/ஆங்கிரச 1932 ம் தொகுதி பக்கம் 995 ல் சொன்னவையே மேலே உள்ள வாசகங்கள்.

இந்து சமய அறநிலையங்களுக்கு அவர்கள் ஆற்றிய பணி பற்றி மாவட்ட கெசட்டியர் ""marudhu brothers:- a revolution in hinduism is brought by them many temples and chatrams were built during their periods dr.a.ramasamy RAMANATHAPURAM DISTRICT GAZETTEER page 893" மருதுபாண்டியர்கள் இந்து சமயம் உய்ய ஒரு புரட்சியை கொண்டு வந்தனர். அவர்கள் காலத்தில் தான் மிகப்பலவான கோயில்களும் சத்திரங்களும் கட்டப்பட்டன" என ஏற்றிப்போற்றுகிறது.

(மருத பாண்டியன் நூலிலிருந்து...)

Read More

மருதரசர்கள் கட்டிய சத்திரங்கள்!

சிவகங்கையில் வரியாக வசூலிக்கப்பட்ட 15 லட்சம் ரூபாயில் பேஷ்குஷ் ஆக 3 லட்ச ரூபாய் போக எஞ்சியதில் மூன்றில் ஒரு பகுதி சத்திரங்களுக்காக ஒதுக்கப்பட்டது. இது பிற்காலத்திய நிலை. ஆனால் மருதரசர்கள் காலத்தில் அவற்றிற்கென்று தனியாக கிராமங்கள் விடப்பட்டிருந்தின. சத்திரங்கள் அனைத்துமே மருது சகோதரர்களால் கட்டப்பெற்றவையே.

ஒரு முறை சத்திரத்து நிர்வாகியாக இருந்த அப்பனய்யங்கார் என்பவர் சாப்பாடு தயார் இல்லை, அப்புறம் வா என்றதும் அதிதியாக வந்தவருக்கு கோபம் வந்துவிட்டது. 'சத்திரத்து சோத்துக்கு அப்பனய்யங்கார் மணியமா?' மருதுபாண்டியர்கள் வழங்குகிற சாப்பாட்டிற்கு அப்பனய்யங்கார் என்ன மணியம் (அதிகாரம்) பண்ண வேண்டிக்கிடக்கிறது. இவன் சொந்த செலவிலா போடுகிறான்" என்று வந்தவருக்கு கோபம் ஏற்பட்டு மருதர்சர்களிடம் புகாரும் செய்து விட்டார்.

ஆக இந்த அளவில் சத்திரங்களை தாராளமாக அவர்களால் நிறுவ முடிந்ததற்கு காரணம் நாட்டில் நல்ல விளைச்சல் கண்டிருக்க வேண்டும்.
தற்காலத்தில் மாவட்ட ஆட்சியர் வழங்கும் "தஸ்திக்" படி (Dastik allowance) மூலம் பெயரளவில் மட்டுமே சத்திர நிர்வாகம் நடக்கிறது.

சிவகங்கை சமஸ்தான சத்திர நிர்வாகத்தினர் வெளியிட்டுள்ள பட்டியலில் 20 சத்திரங்கள் மட்டுமே உள்ளன. இவற்றில் பழங்காலச் சத்திரங்கள் சில விடுபட்டுள்ளன. மாமன்னர் மருதுபாண்டியர்கள் கட்டிய சத்திரங்கள் பசும்பொன் மாவட்டம், இராமநாதபுரம் மாவட்டம், காமராசர் மாவட்டம் மட்டுமல்லாமல் நெல்லை மாவட்டத்தில் கூட அமைந்திருந்தன.

மாவட்ட வாரியாக மருதரசர்கள் கட்டிய சத்திரங்கள் பட்டியல் :-

பசும்பொன் மாவட்டத்தில் :-

1) சிவகங்கை அகிலாண்டேசுவரி சத்திரம்.
2)சிவகங்கை ராஜா சத்திரம்.
3)ஆனந்தாயி ஆத்தாள் சத்திரம்.
4)காளையார் கோயில் சத்திரம்.
5)திருப்புத்தூர் சத்திரம்.
6)திருக்கோட்டியூர் சத்திரம்.
7)பிரான்மலைச் சத்திரம்.
8)மானாமதுரைச் சத்திரம்.
9)முத்தனேந்தல் சத்திரம்.
10)திருப்புவனம் கோட்டைச் சத்திரம்.
11)திருப்புவனம் புதூர்ச் சத்திரம்.
12)குன்றக்குடி அப்பன்சாமி சத்திரம்.
13)குன்றக்குடி காடன்செட்டியார் சத்திரம்.

இராமநாதபுரம் மாவட்டத்தில்:-

14)தொண்டி சத்திரம்.
15)கலியநகரிச் சத்திரம்.
16)சூடியூர்ச் சத்திரம்.
17)பரமக்குடிச் சத்திரம்.
18)பாம்பன் சத்திரம்.
19)அழகன்குளம் சத்திரம்.

காமராசர் மாவட்டத்தில் :-

20)நரிக்குடிச் சத்திரம்.
21)சீனிக்காரனேந்தல் சத்திரம்.

திருநெல்வேலி மாவட்டத்தில் :-

22) நான்குநேரி சத்திரம்....

நன்றி: வரலாற்று ஆசிரியர் மீ.மனோகரன்

Read More

தீ பாய்ந்த அம்மன்!

கணவனும் மனைவியுமான இருவர் பிழைப்பு தேடி தங்கள் ஊரான கோசுகொண்டுவை விட்டு புறப்பட்டு வந்தவர்கள் வழியில் மருதுபாண்டியர்களின் நரிக்குடி சத்திரத்தில் தங்கியிருந்தனர்.
நேரமோ நள்ளிரவு.அவர்களின் நாய் மட்டுமே அவர்களுக்கு துணை.
அந்த நேரம் அங்கு வந்த கயவர் கூட்டம் நயவஞ்சகத் திட்டம் ஒன்றினை தீட்டியது.

கணவரிடம் நயமாக பேகி பேச்சுக் கொடுத்து கொண்டே காட்டு பக்கம் கூட்டி சென்று நாடான் ஊருணி எனும் குளத்தருகில் கொன்று போட்டனர்.
சென்ற கணவன் திரும்பாதது கண்டு மனைவி துடித்தாள்.
நாய் வழி காட்டிட கடைசியில் அது நின்ற இடத்தில் கணவனின் பிணத்தை கண்டாள்.நரிக்குடி சத்திரத்திற்கு திரும்பி வந்து நடந்த துயரை சொல்லி புலம்பினாள். அங்கிருந்தவர்கள் மன்னரிடம் சென்று முறையிட சொன்னார்கள்.சிவகங்கை நோக்கி ஓட்டமும் நடையுமாக விரைந்தாள்.

கண்ணீரும் கம்பலையுமாக தம் முன் நிற்கும் பெண்ணை கண்ட மருதரசர்கள் ''உற்ற துன்பம் என்ன?'' என்று உசாவி முடிக்கும் முன்பே ''அரசே பிழைக்க வழி தேடி வந்தால் உயிருக்கே உலை வைத்து விட்டார்களே! இந்த நாட்டில் ஊருக்கு ஊர் கொலைக்களம் என்று தெரிந்திருந்தால் வேறெங்காவது போயிருப்போமே! இது தான் உங்கள் நாட்டில் நீதியா?'' என்று கண்ணகி போல் தன் ஆவேசத்தை கொட்டி தீர்த்தாள்.

கேட்ட பார்த்திபர்கள் அவளையும் உடன் அழைத்துக் கொண்டு கொலைபட்ட இடம் நோக்கி விரைந்தனர். அதற்குள் கயவர்கள் பிடிபட்டனர். உரிய விசாரணைக்கு பிறகு தண்டனை வழங்கப்பட்டது. தாயினும் மேலாக பார்த்துக் கொள்வதாக பாண்டியர்கள் கூறியும் அப்பெண் மறுத்து தன் கணவனுடன் தீப் புகுந்தாள்.

தீப்புகும் முன் தன் சேலையும், கருகமணி, காதோலையும் கருகாதிருக்குமென்று உரைத்து விட்டுத் தீப்புகுந்தாள். உடல் கருகிய பின் கருகாதிருந்த பொருட்கள் சேகரிக்கப்பட்டு மருதிருவர் குடும்பத்தினரால் நரிக்குடி முக்குளத்தில் பாதுகாக்கப்பட்டன.

கள ஆய்வுக்கு சென்ற போது அப்பெண்ணை தீப்பாய்ந்த அம்மனாக போற்றி அவர் சிதையிலிருந்து எரியாமலிருந்து எடுத்ததாக கூறப்படும் கீழ்க்கண்டவற்றை நார்ப்பெட்டியில் பரணில் வைத்து பாதுகாக்கப்பட்டு வருகிறது என்றும் விசேட நாட்களில் அதை எடுத்து வீட்டு பெண்கள் வழிபடுவர் என்றும் மருதரசர்களின் வாரிசுதாரர்கள் கூறினர்.

பெரிய மருதுபாண்டியர்கள் வழியினரான முக்குளம் முன்னால் கர்ணம் முத்துக்கருப்பன் சேர்வை இல்லத்தில் உள்ள அந்த நார்ப்பெட்டியில் வைத்துப் போற்றிக் காக்கப் படுபவை :-

1.பதினாறு முழ வெள்ளைப்புடவை.
2.கருகமணி.
3.காதோலை.
4.கணவர் அணிந்திருந்த வட்டுடை.
5.ஒரு நீளமான பை.
6.வெட்டப் பயன்படுத்திய அரிவாள்.
7.இவற்றை கட்டிய கொச்சக்கயிறு ஆகியவை.

அன்று மருதுபாண்டியர்களின் ஆட்சிக் காலத்தில் நாட்டில் அமைதியைக் குலைக்க வேண்டுமென்ற நோக்கத்துடன் சில துரோகிகளின் தூண்டுதலின் பேரில் கயவர்கள் செய்த கொடூரச் செயல்களினால் ஒரு பத்தினிப் பெண் பாதிக்கப்பட்டாள்.

இன்று மருதரசர்களின் அடையாளங்களை அழிக்க பல துரோகிகள் முயன்று கொண்டேயிருக்கின்றனர். எத்தனை நாள் தான் துரோகிகளின் ஆட்டம் நிலைக்கும் என பார்க்கலாம்.

Read More

கர்னல் அக்னியுவின் தந்திரம்!

சிவகங்கை சீமைக்குள் நுழைந்த முதல் கட்டத்திலேயே போரில் தோல்வியை தழுவிய கர்னல் அக்னியு அந்த ஆத்திரத்தின் காரணமாக மருதுபாண்டியர்களின் பேரில் அவதூறுகளை அள்ளி வீசியும் போராளிகளுக்கிடையே பிளவை ஏற்படுத்தும் பித்தலாட்டத்தை உள்ளடக்கியும் 1801 ஜுன் திங்களில் ஒரு எச்சரிக்கை பிரகடனத்தை விடுத்தான்.

பிரகடனத்தின் 3வது பாரா:-

கும்பினி சர்க்கார் சிவகங்கை சட்டப்பூர்வு வாரிசு எவராயிருப்பினும் அவருடைய நலனுக்கும், ஆதரவாளர்களுக்கும் கும்பினி அரசு பாதுகாப்பு அளிக்கும்.

சட்டப்பூர்வ வாரிசு தகுதி உடையவர் என கருதுகிறவர்கள் தாமதமின்றி கும்பினி முகாமிற்கு வர எதிர்பார்க்கப்படுகிறார்கள்.

அவர்களுக்கு முழு பாதுகாப்பு அளிக்கப்பட்டு அவர்களின் கோரிக்கை பாரபட்சமின்றி பரிசீலிக்கப்பட்டு நிறைவேற்றப்படும்.

எதிர்ப்பாளர்கள் அவர்களது குற்றங்களுக்காக தண்டிக்கப்பட்ட பின் வாரிசு உரிமை உடையவருக்கு கும்பினியரால் பட்டம் கட்டப்படும்.

பிரகடனத்தின் 4 வது பாரா:-

சிவகங்கை பட்டத்திற்கு உரிமையுடையவராக கருதுகிற எவரும் கும்பினி முகாமிற்கு வராது எதிர்ப்பாளி சின்னமருது அல்லது அவர்களணியில் சேர்ந்தால் அவர்களது பட்டத்துரிமை என்றென்றைக்கும் பறிமுதலாகிவிடும் என எச்சரிப்பதை கர்னல் அக்னியு தன் கடமையாக கருதுகிறார்.

பிரகடனத்தின் 5 வது பாரா:-

எதிர்ப்பாளர் சின்னமருதுவின் உடன்பிறப்பாளர் வெள்ளைமருது தன் தம்பியின் தீயநடவடிக்கைகளை ஆதரிக்கவில்லை என கர்னல் அக்னியுவிற்கு தெரியவருவதால் அக்னியு அவர்கள் குற்றவாளியை தண்டிக்கவும் ஏதுமறியா வெள்ளை மருதுவை காக்கவும் தீர்மானித்திருப்பதால் அவர் தன் குடும்பத்தினருடன் அக்னியுவின் முகாமிற்கு வந்து சேர்ந்தால் அவர்களை மதுரைக்கு பாதுகாப்பாக கூட்டி சென்று நிம்மதியாக வாழ வைக்க அக்னியுவால் அழைப்பு விடுக்கப்படுகிறது./
/மேற்கண்ட பிரகடனத்தில் 3வது பாராவில் கர்னல் அக்னியு தான் 'துட்ட நிக்கிரக சிட்ட பரிபாலனம்' செய்ய அவதாரம் எடுத்திருப்பவனை போல் அறிவித்து கொள்கிறான். உண்மையில் போராளிகளை இரண்டுபடுத்துவதே அவன் நோக்கம்.

அச்சூழ்ச்சியை நிறைவேற்ற 4 ஆவது பாராவில் வெங்கன் பெரிய உடையாத்தேவரையும் 5 ஆவது பாராவில் பெரியமருது பாண்டியரையும் இழுக்க முயலுகிறான். ஆனால் இறுதிவரை அது பலிக்கவில்லை.

"பாஞ்சாலங்குறிச்சி பட்ட பாட்டை அறிவீர்கள் அல்லவா? விருப்பாட்சி வீழ்ச்சி பற்றி கேள்வி பட்டதில்லையா? தேளி திணறித்திண்டாடியதை யாரும் தெரிவிக்கவில்லையா?" என்று சிவகங்கை மக்களை சிறுபிள்ளைகளுக்கு பூச்சாண்டி காட்டுவது போல் பயமுறுத்துகிறான். யாரும் மசியவில்லை என்றபின் சாதியை வைத்து பிரித்தாலும் சூதில் இறங்கி கௌரி வல்லபர் என்பவரை அதற்கு கேடயமாக பயன்படுத்தி தன் நோக்கத்தை சாதித்துக் கொண்டான்.

இன்றளவும் சிலர், அக்னியுவின் இது போன்ற அவதூறு பிரகடனங்களை ஆதாராமாக பிடித்து தொங்கிக் கொண்டு தலையும் இன்றி, வாலும் இன்றி மருதரசர்களின் புகழை கெடுக்க முயற்ச்சிப்பது நகைப்புக்குரியது.

Read More

மாமன்னர் மருதுபாண்டியர்களால் சிவகங்கை சீமையில் உருவாக்கப்பட்ட ஊருணிகள், குளங்கள!

1.சிவகங்கை முத்துப்பட்டி ஊருணி
2.சிவகங்கை உடையார் சேர்வை ஊருணி
3.சிவகங்கை ஆத்தா ஊருணி
4.சிவகங்கை இலட்சுமி தீர்த்தம்
5.காளையார்கோயில் கோயில் உள் திருக்குளம்
6.காளையார்கோயில் ஆனை மடு
7.காளையார்கோயில் மருதவனப் பொய்கை
8.கொல்லங்குடி மருது ஊருணி
9.குன்றக்குடி மருதாபுரிக்குளம்
10.சிறுவயல் புலிக்குட்டியம்மன் கோயிலுக்காக ஒரு திருக்குளம்
11.சிறுவயல் கிருஷ்ணர் கோயிலுக்காக ஒரு குளம்
12.சிறுவயல் கிராம மக்களின் குடிநீருக்காக மாண்கொண்டான் பொயகை ஊருணி
13.சிறுவயல் வண்ணார்குளம்
14.சங்கரமதி ஊருணி
15.தொண்டி கைக்களான் குளம் என்ற காளிகனத்தான்குளம்
16.நரிக்குடி ஊருணி
17.திருக்கோட்டியூர் திருக்குளம்

கேணிகள் :-

நரிக்குடியில் மருதுபாண்டியர் கிணற்றை பாண்டியன் கிணறு என்றே அழைக்கின்றனர். நரிக்குடியை போலவே பல இடங்களில் தாகம் தீர்த்திட தடாகம் மட்டுமில்லாமல் கிணறுகளும் தோண்ட செய்தனர் மாமன்னர் மருதுபாண்டியர்கள். சிவகங்கை - மானாமதுரைச் சாலையில் கீழவாணியங்குடி அருகிலும் சிவகங்கை - வரிச்சூர் சாலையில் முத்துப்பட்டிக்கு முன்னதாகவும் மருதுபாண்டியர் கிணறுகள் இருந்து தூர்ந்து போய் கிடக்கின்றன.

மாமன்னர் மருதுபாண்டியர்கள் மக்களின் குடிநீர் தேவைக்காக நகர்நடுவிலும் சாலையோரங்களிலும் கோயில்களை ஒட்டியும் வெட்டிய குளங்களும், மற்றும் கிணறுகளும் எண்ணற்றவை. ஆதாரப்பூர்வமாகத் தெரிந்த சில குளங்களும், கிணறுகளையுமே இங்கு குறிப்பிடப்பட்டுள்ளது.

Read More